Dil Toota Aisa Ki Shayad Phir Kabhi Nahi

[aries]

Mera naam Hari hai aur main Kanpur se hoon. Yeh baat 4 saal pehle ki hai jab main 11th mein tha. Maine apni schooling Kanpur se ki hai aur jab main 11th mein tha, tab gharwalo ne wahi settle hone ka plan banaya. Us waqt humne ek posh area mein ghar le liya. Mujhe kya pata tha ki yeh ghar mere liye itna lucky sabit hoga. Humein wahan rahate hue kareeb 4-5 mahine ho gaye the, aur meri life bhi normal thi - school jana, wapas aake coaching ki bhagdaudi.

Phir ek din mummy ne bataya ki aaj khana nahi banega kyunki hamare padosi, jo peeche ghar mein hain, unke yahan aaj grahpravesh hai aur sabhi ko lunch par bulaya gaya hai. Main shuru se sharmila tha aur mujhe kisi ke ghar jana sahi nahi lagta tha. Maine kaha, "Main nahi jaunga, main khud bana lunga. Aap log jao." Mummy ne kaha, "Jaise theek samjho," aur wo sab wahan grahpravesh mein chale gaye. Main ghar mein akela tha aur apne school ka kaam karne laga. Tabhi kareeb 2-3 ghante baad mummy ka phone aaya aur bola, "Aunty bol rahi hai ki Hari ko bhi bulao, to mujhe aana hoga." Maine fir mana kar diya aur apne kaam mein lag gaya.

Thodi der mein mere peeche wala darwaza knock hua. Mujhe laga meri behan aayi hai mujhe bulane, to main apne room se zor se bola, "Mujhey nahi aana." Lekin jaise hi main darwaze tak gaya, maine dekha wahan do ladkiyan khadi hain - ek white dress mein thi aur dusri ka mujhe yaad nahi. Par jo white dress mein thi, main use dekhte hi reh gaya... Bas wo ek aisa pal tha jab sach mein laga ki 'Love at first sight sach mein hota hai.' Uske haath mein khane ki thali thi jo puri cover thi. Main chup ho gaya aur kuch bol nahi paya. Tab usne bola, "Hum aapke peeche wale ghar mein aaye hain aur yeh lunch aapko mummy ne bhejwaya hai." Mujhe samajh nahi aa raha tha ki kya bolu... meri bolti band thi... aur fir woh chali gayi!

Jab mummy log ghar aaye tab main unke peeche peeche laga raha ki kya hua wahan, kaun kaun aaya tha, kaise hain wo log... asal baat to kuch aur thi, mujhe toh us white wali ka pata karna tha. Mummy ne bataya ki unke ghar mein do daughters hain aur ek son hai.

Lekin mujhe kuch khaas pata nahi chala... Fir kuch dino tak main uske baare mein pata karne laga... tab jake pata chala ki uska naam Raveena hai aur wo 10th mein hai. Wo mujhse ek saal choti thi... Aur waqt beetta gaya, main 12th mein aa gaya aur wo 11th mein... Unke ghar aur hamare ghar walon ke beech nazdeekiyan badh gayi... Hamare relations kafi achche ho gaye the... par mujhe usse baat karne ki himmat nahi hoti thi, bas chup chup kar dekhta aur khush ho jata... pata nahi kyun mujhe lagta tha ki wo bhi meri taraf interested thi, par baat nahi ho pati thi.

Agar kabhi wo mujhe face karti to wo wahan se chali jati aur agar main kabhi usko face karta to main bhi use face nahi kar pata. Wo kafi sweet aur simple ladki thi... Meri behan aur Raveena ke beech kafi gehri dosti ho gayi thi.

Mera birthday aane wala tha. Meri behan ne usse batadiya tha. Luckily mera birthday Sunday ko pada... Aur jaise usual hota hai, main Sunday ko der tak sota rahta hoon, par us din subah subah meri behan aayi aur boli bhai tumse koi milne aaya hai... Maine kaha aaj Sunday ko itni jaldi kon hai... Tabhi maine dekha ki Raveena aur uska bhai dono mere room mein aa gaye aur unhone mujhe birthday gift dete hue birthday wish kiya... Aur thodi der baad chale gaye...

Main us din itna achha feel kar raha tha ki bata nahi sakta. Wo thodi der baat mujhe ek ek line abhi tak yaad hai. Lekin abhi sab batein share karunga to kafi time ho jayega!

Main jaldi jaldi fresh hua aur kareeb 10 baje apni behan ko bulaya aur bola ki kyun na kahin bahar birthday celebrate karne chalein? Wo turant ready ho gayi, par maine kaha ki kyun na Raveena ko bhi sath le chalein? Usne bhi haan bol di... Par baat toh Raveena ke mummy se bahar jane ki permission lene ki thi... Toh behan boli wo sambhal legi. Thodi der mein Raveena aa gayi aur uski mummy bhi sath mein aayi... Aunty ne permission de di.

Us waqt hamare paas sirf bike thi aur baithne wale teen the... Par maine is mauke ko jaane nahi dena chahta tha isliye maine kisi na kisi tarah adjust kiya...

Us waqt I was in 12th and mujhe itna nahi pata tha kahan le jaoon tab to 500 rs bhi bahut matter karte the.

McDonald's, KFC, coffee house, blue lounge - blah blah jagah ghumate hain par sath dene ko apna koi nahi hota!

Anyway back to the story… Fir maine socha kyun na kahin kuch khane chalein… I know you all will find it funny but main unko ek restaurant le gaya jiska naam tha “Sainik Restaurant.” Pata tha hasoge sab… but it’s true… wahan jakar hum log baithe aur menu dekhne lag gaye.

Comedy yeh thi ki jo bhi hum order karte wahan wo ya toh nahi hota ya toh bana nahi hota… Baad mein sabne socha kyun na paneer parathe mangwaye jaye… “Han han pata hai soch rahe honge ki itni important time paneer parathe par main kya karta us din kuch bhi chalega… jisse uske sath time spend kar sakun!”

Hamare paneer parathe aa gaye; sach batau to us samay tak maine paneer ka paratha kabhi nahi khaya tha… Aur jaise hi hum sabne wo khaya, wo paneer parathe kisi ko achche nahi lage… Meri behan ne to khane se hi mana kar diya.
At last usne wo parathe nahi kha payi; wo the hi itne bure parathe ki koi bhi na khaye!
Fir thodi der tak hasi majak hota raha and 1 ghanta beet gaya pata hi nahi chala… Uske baad humne elaichi wali ice-creams khayi.
Phir hum wahan se ghar chale aaye; woh mere ghar mein kafi der tak ruki rahi aur hamari baat hoti rahi; na hi main chahata tha ki woh jaye na hi shayad woh. Baad mein kareeb 1 ghante baad woh chali gayi aur main bhi sweet memory ke sath rah gaya!
Us evening main bahar khada tha ki woh aayi aur boli “aaj ke paneer ke parathe mein kabhi nahin bhulungi.” Maine kaha “Han Han uda lo majak.” Aur ye kehkar woh chali gayi...
Yuhin chalta raha; mera admission B.Tech mein ho gaya aur main Dehradun aa gaya.
Aur mera usse contact toot gaya… Ab jab bhi main Kanpur jata hoon, main usi ko dhoondhta rahta hoon shayad kahin woh dikh jaye par ab toh woh bilkul alag si ho gayi.
Mujhe samajh nahin aata kya karun… Sabki life mein kai ladkiyan aati hain; kaiyon ke liye feelings develop hoti hain par shayad mere case alag hai… Mere liye shayad woh hi last ladki thi jisne mere dil aur dimaag mein jagah banayi thi; uske baad na koi ladki pasand aayi na kisi ke baare mein socha…
Bas yahi ek problem hai ki ab tak usko bata nahin paya hoon; jab sochta hoon toh ye khayal aata hai ki woh kya sochegi, kya image rah jayegi meri uski nazar mein… Kahin agar usne kuch bol diya jo main nahin chahata toh shayad ye dil aisa tootega ki shayad fir kabhi nahin judega…
Sab kahte hain bol de nahin toh der ho jayegi; fir pachtayega… Lekin agar usne mana kar diya; meri bilkul alag image ban gayi meri uski nazar mein toh sach mei, main bahut lonely ho jaunga sab ke beech hote hue bhi…
Isliye maine yahi apni chup ko dil ki tasalli dete hue aise hi life mein aage bhi nahi batane ka socha hai!
Sorry guys agar aapko ye meri real story buri lagi ho but har line sach hai… agar kuch bhi laga ho please do comments.