Wo Khush Rahe

[aries]

Mera naam Shipra hai, main Kanpur mein rehti hun aur MBA ki padhai kar rahi hun. Main aksar apni mummy ki madad karti hun ghar ke kaamon mein. Aaj main ek aisi kahani share karne ja rahi hun jo mere liye bahut maayne rakhti hai.

Yeh ek udaas romantic kahani hai. Jab main B.A. ki student thi, tab meri class mein ek ladka tha jiska naam Shivam tha. Uska swabhav bahut accha tha aur wo sabki izzat karta tha. Mujhe us par dheere-dheere pyaar hone laga, lekin hum dono ek doosre ko nahi jaante the.

Jab hamare exam nazdeek aaye, humein practical files submit karni thi. Ladkiyan in cheezon mein aage hoti hain, jabki ladke thode dheele hote hain. Shivam kaafi din se college nahi aaya tha, isliye shayad use nahi pata tha ki file submit karni hai.

Kuch din baad jab Shivam college aaya, tab use pata chala ki sabne apni files bana kar submit kar di hain. Usne dosto se file maangi, lekin unhone bhi file submit kar di thi. Main uske paas gayi aur kaha, “Shivam, koi baat nahi, main tumhari file banane mein madad kar dungi.” Usne khushi se maan liya aur maine use kuch notes diye. Usne apni file complete ki aur mujhe thank you bola. Us din se hum ache dost ban gaye.

Exam ke dauran hum dono ek doosre ki madad karne lage. Exam ke baad hum itne kareeb aa gaye ki roz phone par baatein karte the aur raat bhar baatein hoti thi. Ek din Shivam ne mujhe propose kiya aur maine haan kar diya.

Lekin dheere-dheere hamare rishte mein samasyaen aane lagi. Shivam ab kisi bhi ladke se milne par pareshan hone laga. Hum dono ek doosre par pura bharosa karte the, lekin wo darne laga ki hum alag na ho jayein.

Phir wo choti-choti baaton par gussa hone laga. Main bhi use bahut pyaar karti thi, isliye maine kisi bhi ladke se milna band kar diya. Lekin phir bhi Shivam kabhi na kabhi kisi na kisi baat par jhagda karne laga.

Aakhirkar, ek din hamare beech itna bada jhagda hua ki humein alag hona pada. Kuch din baad usne mujhe contact karne ki koshish ki aur hum phir se mil gaye, lekin main jaan chuki thi ki hum kabhi saath nahi reh payenge.

Aaj main MBA kar rahi hun aur hamara rista kareeb 3 saal tak chala. Main ab bhi usse utna hi pyaar karti hun, lekin mujhe pata hai ki humne apna rista is had tak kho diya hai ki ab wapas judne ka koi mauka nahi hai. Bas main bhagwan se yahi prarthana karti hun ki wo jahan bhi ho, hamesha khush rahe.